الفراخ المشويه على الجريل بكل أسرارها Leave a comment

اول خطوة مهمة جداً وتعتبر أساس نجاح الوصفة .. وهى إننا إزاى نفتح الفرخة صح ونشيل سلسلة الضهر منها .
(السلسلة بتتفرز وتتسلق فى اى وقت ويتاخد منها شوربة مش بنرميها)
وبعدين بنفردها كويس ونضغط عليها بإيدينا عشان تبتدى تفتح كلها واجزائها تنفصل عن بعض من الداخل وده هيخليها تستوى كويس والتتبيلة تتوزع فيها بشكل متوازن وكمان شكلها يكون حلو ????
تابعوا الصور للتوضيح
ملحوظتين مهمين
اى دجاج مشوي لازم وزنه يكون صغير من كيلو الى كيلو و٢٠٠ جرام فقط
الدجاج المشوي يا إما بيكون مجمد مسبقاً أو منقوع فى محلول نقع مدة لا تقل عن ١٢ ساعه وتصل ل ٤٨ ساعة
الدجاج الفريش الطازج لحمة هيشد ومش هيبقى طرى.
ودى تتبلية مميزة للدجاج المشوى
توابل جافة ( ملح وفلفل وتوم بودرة وبصل بودرة وبابريكا وحبهان مطحون ومعلقة سكر صغيرة ورشة كمون ورشة قرفة ومعلقة صغيرة كركم ) + مكعب مرق خضروات او دجاج نفرمه معاهم
هنضيف عليهم معلقة كبيرة مستردة ومعلقتين لتلاتة كاتشب وربع كوب صغير زيت ونقلب كل ده مع بعض لغاية مايبقى زى المعجون
بخلة سنان أو خلة شيش او سكينة بوزها رفيع هانخرمها خصوصاً فى المناطق اللى لحمها كثافتة عاليه
هاندهن الفرخة برة وجوة وبين الجلد وفى كل مكان نقدر نوصولوا
ونحطها فى كيس تلاجة ونضيف عليها باقى التتبيلة ونسيبها فى التلاجة مش اقل من ساعة وياريت نقلب الكيس كل نص ساعه.
بعدها نخرجها بتتبيلتها ونحطها فى صينية ونغطيها بفويل أو نحطها فى كيس حرارى وندخّلها الفرن على درجة حرارة ٢٠٠ لمدة ساعة ونص ونشيل الغطاء أو نفتح عليها الكيس ١٠ دقايق كمان تحت الشواية عشان تاخد لون.
أو نحطها على الجريل وتتقلب كل ١٠ دقايق او على الشواية الفحم وتكون على إرتفاع مناسب من مستوى اللهب ما يقلش عن ١٢ سم عشان ماتاخودش لون من برة وقلبها يكون لسه ما استواش كويس
وسلاطاتكم بقى وبألف هنا وشفا 😋😋😋😋😋😋